Trin phejna Romajna mule ki angleder andi jag ko Rim – Italija

ROMKI ITALIJA

Trin phejna taro Romano nacionaliteti mule ki anglederandi jag ki Italijakiri sherutni diz Rim.

Ola thabile ki kampersko prikolka ko predgradie e Rimeskoro, dena haberi o francijakere mediumija.

O kurbanke phejna Romane avipaja kola so sine ko baripe taro 4, 8 thaj 20 bersha, sovena sine pire jerijencar thaj panda pire 8 pralencar thaj phejnencar, kana I prikolka shurakergja te thablovel lendar.

O snimke taro bezbediteteskere kamere siakvena sar jek manush chudela shishi upral I prikolka angleder oj te thablovel, dena haberi o sluzbe.

Nane jasno dali si ko puchiba ksenofobijakoro resariba jali dali nekoj taro javer jeriluko akale romane jerilukoja ikalela piro garazi, sikavena o britanijakere mediumija.

O dzene kola so achile dzivde taro akava Romano jeriluko vakerena kaj nekozom divesa angleder I rat te thablol olengiri kampina lele bare darakerina, prelegarena o italijakereda mediumija.

I proromani kupa anavkerdi sar “Asociacione 21 Lulijo” koja so nichaleste kritikunela o aktija e diskriminacijakere thaj o atakija upral o Roma ki Italija, sikavela duk sebepi I tragedia.

O Italijakoro prezidenti Serdzo Matarela adalatkergja o “strashno zlostorstvo” dzikote o papa Francisko bishalgja pire kapelane te uteshinel e jeriluko thaj te ingarel lengje arka.

You may also like...

Sorry - Comments are closed