Tikno Romano chavo premardo taro javera chave salde sebepi so ko vasta ikerelale sine srbijakoro bajrako !

PRETEPAN ROM

Kupa taro sikle taro 8to klasi tari Fundavno Siklana “Karagorge” premargje irati rakjakoro jekhe chave taro 7to oddelenie, a o sebepi basho akava, sar so vakerena o svedokija sine salde odoleske soske o chvo so margjele sine Rom.

Sar so prelegarena o mediumija, o chavo ki siklanakiri avlija ikerela sine ko vasta srbijakoro bajrako, a nekozom 8to oddelenieskere sikle gele dzi leste thaj vakergje leske kaj nanele nijami te legarel odova bajrako odoleske soske ov si Cigan.

Palo odova chudingjepe leske thaj shurakergja te khuvenle, tepnencar thaj tasavena le sine. Oleskoro klasno vaslegarutno Vladinka Jakshik andingja kaj o ratvarina nane odoborom but darakerinakere, kozom so si darakeribaskoro o sebepi taro akava incidenti.

– Ov isile nekozom grbime thana, a ki akaja chipota odova nane nesavo baro problemi. Numa darakeribaskoro si so ov sine atakuimo tari rig na Romane siklengoro salde odoleske soske ov si Rom, vakerela I Jakshik, thaj dzivakerela kaj olakoro siklo si shukar thaj krotko thaj sigurno si kaj tari leskiri rig nasine nisave provokacie. Oj andingja kaj I siklana ka kerel sa so si ko lakoro protokol basho rashaloviba akale incidenteskro.

– Amen odova ko sig vakti prijavingjamle ki dzandarmerija thaj ka kera sa so si ko amaro nadleznost e siklanakoro, odoleske soske akala 8to oddelenieskere sikle kamlape te den dzevapi kote sine o siklanakoro dzandarmerijakoro dzeno ko vakti kana iklilo o incidenti, dzeno kova so basho o bezbediteti pire chavengoro pukinenale o jerije, thaj andinela kaj ko odova momenti ov na sine ko piro bukjarno than, odoleske soske ov kerela buti ko istono vakti thaj ko javera siklane thaj nanele phandin te ovel sasto vakti ki akaja siklana.

You may also like...

Sorry - Comments are closed