Sa pohari o Romane chave sikavena intereso basho zanaetija !!!

коваци

O ekonomijakoro naispukiniba sa pobuter tiknarela I mangin kori o terne Roma te sikljoven thaj te keren buti nekole taro e purane zanaetencar. O purane generacije taro Roma nekana ikalena sine but love thaj egzistencija pire chavengje prekal o zanaetija, numa spremal o rodarina, avdive o terne Roma vakeren kaj bi sikljovena zanaeti salde ako oleja shaj te obezbedinen nichale strestvija basho dzivdipa.

Ko puchiba dzi ko terne dali nekana bi shurakerena te keren buti ko disavow sanaeti, ola kategorikane vakergje na, nasho nisavo zanaeti.

Oja, isiamen intereso, numa o bibukjardarnipa si buti baro. Te ovel sine barem buti, te ovel amen profit, pakjalape kaj thaj o zanaeti bi lelakerajale. Akana nashti te shurakera zanaeti, kamlape te dzan amengje 2 dzi ko 4 bersha te sikljova bizo nisavo legariba taro love khere. I buti si tiknardi sekote, nane buti basho phirne pa kamoli amengje e ternengje, vakerena o terne.

– Shaj, na dzangjola. Zavisinela.. na bi ovela bilacho te lelpe disavo zanaeti. Bi ovela odova nevo dzandipa, shukar sit e dzanelpe zanaeti. Gndinava kaj sekova jek kamlape te dzanel po diso, vakerena o anketirime dizutne.

O zanaetchije Roma, paluneste okola so kerena buti ko zanaeti kovachluko, nostalgijaja denape ki godi ko vaktija kana o zanaetija sine profitabilna a olengere dukjane pherde terne chirakoncar. Numa, sebepi o slabo interes but zanaetija sar so si limarija, shapkatija, stolarija, kunduradzije, juzajra, si angleder te nashavgjoven.

– Sineman chirako, numa gelo peske odoleske soske mangjela sine love, rodena uche plate. O zanaetija si veke ko meriba. Nane veke. Palo amende merena veke. Ki charshija sakosa achile duj kovachija. Pobuter nane. Ni jek terne na avela te sikljovel zanati. Mangena polokhi buti. Mangjena administracija odoleske soske o zanaeti si popharo. Me sijum tari pophuri generacija, pali mande nane nikoj veke, vakerela kej phirno Rom kovachi tari amari them.

– Na dzanava nekoj te avel thaj te puchel te ovel chirako. O zanaeti nashavgjovela kana o majstori nashavgjola, a kori mange si mujal akava. O majstori si dzivdo, sasto, shaj te kerel buti, isile mangin te kerel buti. Isiamen sa o artiklija. Znachi o majtori si dzivdo o zanati agorkergja, Soske, odoleske soske nane amen dzene so ka keren buti pali amende, vakeren o phirne.

O zanaetchije dena akhariba dzi ko politicharija te prelen soodvetno napija, a ako kergjape mujal akava ko pashutno avutnipa ka ovel sakosaskoro faliba e zanaetchijengoro. Ko akava chane, o zanaetchije ka dzan ki istorija. Momentalno, o jekhutno sigurno zanaeti so ko Roma kerenale buti thaj o terneda roma si o frizersko.

You may also like...

Sorry - Comments are closed