Rom taro Kumanovo lela 13 bersha phanlipa sebepi so chorgja 100 evroja

ZATVOR

O Ismet Shainovski, dat e 21 bershengere Birsan Sejfulaskoro, anglo o Fundavno adalati ko Kumanovo avdive sikavgja piro bichalipa, odoleske soske oleskoro chavo si adalateja dzezuimo ko phanlipa taro 13 bersha, basho kerdo phagerdipaskoro kotor choriba.

Ov zojrakerela kaj oleskoro chavo nikanao na sine hemimo ko kupakoro keriba choripa, kova so ulo ko mart o bersh ko sporteskoro aerodrome Adzitepe ko Kumanovo, kote so 4 dzene, mashkar kolende spremal o adalati si thaj o Birsani, arakuingje trine imigranten taro Avganistan thaj chorgje lender 100 evroja.

O chavo e Ismeteskoro sapanda arakhlovela ko pritvor ki Shutka, kote so ka ovel arakhlovel dzi ko aniba e nijamutne takateskere adalateskere decizijakoro, dzikote e tiknebershengere praleske e Birsaneskere, kova so isto ov da si adalatkerdo basho o istono kotor, angjape leske alternativno napi, takatlimo dikhlariba taro jerije, a palo o javer duj dzene panda sapanda rodarelape.

Sar so dodzajnelape o adalati predlozingja e Birsaneskere te vakerel piro bangipa thaj odma te shurakerel te kerel piri phanlipaskiri dzeza, agar so I istono ka ovel tiknardi basho trin bersha.

– Manush kova so mudargja na lelakerela odoborom phari phanlipaskiri dzeza. Amen o Roma sijam marginalizirime, me sijum ko shok. Ki dzandarmerija marena me chave te shaj te priznainel o kotor. Ola zojrakerena kaj sinele love, ov na sinele love ni basho cigare. Mo chavo ko odova dakiko sine ko Dizjakoro kej thaj ki Sporteskiri hala, sinele jek shehidi, numa oleste o adalati na lelakerelale. I adalateskiri decizija angjape leske ande, amen sar jerije na mukle amen te khuva thaj te shuna I istono decizija, vakergja o dat e Birsaneskoro thaj havlargja kaj ka rovelpe dzi ko Apelacijakoro adalati.

O advokati e Birsaneskoro, Marjan Vitanovski vakergja kaj I avgodigroskiri decizija e Fundavno adalateskiri ko Kumanovo si andi upral funda e sikavinakoro prependjariba. Ov dzivakerela kaj ki akaja chipota si kerdo diskriminacija, odoleske soske basho choriba taro 100 evroja, bizo te dikhele upral kova dzeno kergjape o choripa, anelape decizija isto sar I decizija basho mudariba.

– Isi but nijamutne bishukar sikavde momentija, kola so ka sikavenpe ko sasuitnipa palo o sikaviba e rojbaskoro dzi ko Apelaciono adalati, o avutno kurko. Numa, sar so shajdipaskoro o imigrantija rahatlipeste te phiren, neli kamlape te oven ko lelakeribaskere centrija thaj sar shaj ki olende te pakjalpe, a n ate pakjalpe e Birsaneske, vakerela ov.

O bichalipa tari I adalateskiri decizija, tikne khedibaja anglo o Fundavno adalati ko Kumanovo avdive sikavgje thaj nekozomo 50 dizutne taro Romano nacionaliteti.

You may also like...

Sorry - Comments are closed

Send as Kolumns





Full Name (required)

Your Email (required)

Category (required)

Upload File (required: .txt, .doc, .docx)

Captcha (required)
captcha