Promocija e rodaribaskoro basho kulandipa e socijalno benificiengoro tari rig e Romane jekhinakoro, misafiri ki promocija I ministerka Carovska

ЦАРОВКА

I Ministerka absho trud thaj socijalno politika Mila Carovska lela than ki promocija e rodaribaskoro kova so kergjape basho odova kozom si kulandime o socijalno benificie thaj o faktorija kola so simantririnena o avipa e Romane jekhinakoro dzi ko “Lovengere dzupherdipna basho o chave taro jerilukija ko socijalno riziko”.

Sar so dena haberi taro Ministeriumi basho trud thaj socijalno politika, I Carovska potenciringja kaj akaja dikhin si paluneste inportantno odoleske soske o predlogija basho tranipe ko sistemi basho socijalno transferija dzi ko dizutne avena bash taro dizutnikano sasuitnipa, odothar kotar so hem oj da avela sar ministeri.

– Bershencar dikhaja sar o socijalno transferija pobangjeste delape lengje drom thaj sebepi odova ola na dena piro efekti thaj odoleske ko akava miro lafikeriba nane te kosav miro plitikakoro lafikeriba numa ka kerav lafi tumencar sar profesionalcija thaj sar manusha kola so chachipnaske kerena zorija ko nakhle bersh te tranpuinen jali te poshukar keren o sistemi sa resarinaja agorutneste o dizutne te dzivdinena but pokvalitetno, vakergja I Carovska, tergjovela ko havlariba.

Oj irangjape ko nijami e chavorikane dzipherde lejbaskoro love kova so spremal late ko momentalno sistemi na khelela piri khelin odoleske soske odola kola so si o hemchorole nane astarde odole chavorikane dzipherde legaribaja taro love.

– Esapinkerava kaj o chavorikano dzipherdipa e lovengoro kamlape te transformirinelpe ko diavo javer dikhlo dzipherdipa e chavorikane lovengoro, a koleste so ka kamlape sarine ko jek than: MTSP, O Centrija basho socijalno buti, o dizutnikane organizacie, dizutne thaj mashkardzijaneskere organizacije te arakha chane sar te strukturirina o nijamija thaj te da dzevapi ko hemime darakerina, potenciringja I Carovska.

I Ministerka Carovska, dzivakerelape, kergja lafi thaj basho jerijengoro dziphero legariba lovengoro, kova so spremal o esapija thaj spremal o hardzime budzeteskere sredstvija na resargje I resarin basho bajrariba e nataliteteskoro thaj vakerela: – Nashti te ovel dzipherdipa basho trito chavo thaj te adzikera kaj ka ovel bajrariba e nataliteteskoro ki chipota kana isi masovno ikljoviba e terne dzenengoro tari rashtra, vakergja I Ministerka Carovska.

I promocija e rodaribaskoro basho odova kozom kulandinena o socijalno benificie thaj faktorija o Roma si kerdo ko vakti taro noemvri 2016 dzi ko fevruari 2017 bersh, taro amalipa Roma SOS kova so kergjale ko akala shov komune: Prilep, Shuto Orizari, Bitola, Shtip, Kumanovo thaj G.Petrov sa resarinaja te identifikuinenpe o achovina thaj o sikavina kola so isilen piri khelin ko phejrariba e nijamengoro e Romane chavorengoro kana ko dikhiba si olengiri socijalno arakhin, ikerinaja tari kancelarija e UNICEFEskiri taro Skopje.

You may also like...

Sorry - Comments are closed