O Romano jeriluko taro mulo phanlo dzeno Erdal Jusinov, doshalkerena thaj rodena dzevapi taro o nadlezna!

ROMI MRTOV

Panda jek meribaskiri chipota ko Makedonijakere phanlipa! O dzene e jerilukoskere taro o mulo Romano 25 bershengoro chavo Erdal Jusinov, doshalkerena kaj o dzevapluko basho oleskoro meriba isilen hem o komandirija hem o saslarutne tari phanlipe ko Ship, odoleske soske , navodno, na dengjele I zarurireskiri arka.

Ko lafikeriba, ko olengoro kher ki Romani mahala ko Shtip, trujal o seriozno doshalkeriba bashi I chipota ko shtipeskoro phanlipa, ola rodignej dzevapi thaj basho esapija tari obdukcija thaj basho sebepija basho odova soske o nadlezna taro phanlipa na dengje haberi basho meriba e Erdaleskoro, numa o tragichno mesazi dodzangjape taro o adalatkerde dzene?

I phen taro o mulo, Muzej Jusinova, vakerela kaj angleder te merel olakoro pral, prekal elefoni kergje lafi thaj kaj rungjape kaj o komandirija thaj o phanle dzene bilacheste legarenape oleja, numa thaj e javereda Romencar kola so ikerena phenlipaskiri dzeza.

O komandirija vakerena leske sine: A, be, avrial kerdo chavo, na sine li tuke bilache kana chorgjan, a akana rovejatut kaj isitut sastipaskere problemija. Ma prekertut khanchi nane tuke! Mo pral mulo terno thaj pali peste mukle romni thaj duj tikne bershengere chave. Akana, koj ka arakhel len? I Soijalno arka so lenala si lengje 1300 denatija, vakerela I phen.

O pral e Erdaleskoro, Dzokshun Jusinov vakerela kaj o komandiri na muklale te vizitkerel pire prale dzikana sine dzivdo. Ov sikavgja kaj o straze taro phanlipa ko Shtip si korumpirime thaj kaj na mukena e phanledzenengje te khelen komari!

– Kana gelun te dikhkav mire prale, angleder te merel, o udareskere dzene na mukle man andre, vakerena mangje: Cidetut, ili ka latut ko phanlipa thaj ka phagatut maribastar! Numa, te ovelman sine love te davlen, sar so denalen javera, tegani ka mukenman te khuvav thaj ka arakhav sine me prale, thaj ka legarenpe sine oleja sar so kamlape, vakerela oleskoro pral.

O jerije e mule dzeneskere Rom sikavena kaj o nijamija ka rodenlen dzi ko agor thaj kaj nane te muken o bangje dzene te nakhen bizo dzeza. Dena mesazi thaj kaj o Roma taro Shtip si hazrlije te ikljoven ko protesti, ako na halovelape akaja chipota.

You may also like...

Sorry - Comments are closed