O Romane dzuvlja taro Shuto Orizari protestiringje angli i ambulanta e Komunakiri: Rodaja MATICHNO GINEKOLOGO

ZENI ROMKI

Leplivo lentencar ko muja thaj transparentencar, prekal protestno performansi, o dzuvlja Romajna sikavgje piro revolti odoleske soske o Ministeriumi basho sastipa na shajsargja sapanda basho sakana te arakhel ginekologo kova so ka kerel buti ki Ambulanta ko Shuto Orizari.

Pali i jek kupa rodarina thaj dikhina e instituciencar, sar thaj jek kupa taro o dende lafija lende tari rig e resorno Ministeriumeskoro basho sastipa, o dzuvlja Romajna taro Shuto Orizari, sapanda nanelen matichno ginekologo.

O vakteskere napija, ande ko 2014 bersh, a reviridime ko noemvri 2015 bersh spremal kolende sine anglederdikhlo ginekologo te avel jek drom ko kurko, a tarno nabut nakhlo vakti thaj po trin drom ko kurko, sikavgjepe sar biefektivna thaj bichajlaribaskere, so sa odola esapija prekal piro reformansi avdive sikavgjele o dzuvlja taro Shuto Orizari prekal piro protestno performansi so ikergjape angli i Ambulanta e komunakiri Shuto Orizari.

O angledershartija kolencar so arakhenape o dzuvlja kola so si ko reproduktivno vakti tari komuna si but bare. O nanipa matichno ginekologo cidela pali peste thaj bilachi sastipaskiri arakhin basho o Romane dzuvlja, nanipa avipa dzi ko nichale, ko vakti thaj but zarureskere dihkhlarina thaj usluge, thaj sa akala bilachipna seriozno chivena telal ki dar o sastipa e Romane dzuvljengoro, numa thaj e dajengoro thaj e bebengoro.

O dzuvlja taro Shuto Orizari avdive rodingje dzevapija, numa thaj dzevaplipa thaj napija kola so ka oven implementirime ki praktika, taro ministeriumi basho sastipa, numa thaj taro o dizjakorosherutno ki komuna Shuto Orizari.

Puchena kola si o avutne pire thaj so ka prelelpe dzikote na prijavinelape matichno ginekologo dzi ko agor taro chon januari thaj trujal i havlardi lovengiri stimulacija?
Puchena sar i komuna ka phejrarel piro dendo lafi te lel than finansisko strestvoncar sa resarinaja dzipherdeste te stimulirinel o prajbe ordinacija e matichno ginekologijakiri ko Shuto Orizari? Sar ka halovelpe o problemi e nanichale numeroja taro patronazno phejna kola so kamlpe te vizitkeren e Romane dzuvljen barem duj drom ko thavdipa e khamnipaskoro.

O istono dzuvlja, interesirinenape kola si o mehanizmija thaj ko kova chane ka obezbedinelpe phejrariba e bizolovengere ginekoloshko thaj mikrobiologijakere dkhlarina, sar thaj bizolovengoro bijanipa, bizi hemin dali isilen jali na sastipaskoro osiguriteti o khamne dzuvlja.

You may also like...

Sorry - Comments are closed

Send as Kolumns





Full Name (required)

Your Email (required)

Category (required)

Upload File (required: .txt, .doc, .docx)

Captcha (required)
captcha