O Roma teleder o Kale sapanda ko pravdo, I rashtra dzianglal dela lafi ko dejbe len montiribaskere objektija !!!

под кале

E Romengje kola so dizvdinena telal ki pravdi havaja sar so achile bizo pire improvizirime khera teleder o kale ka ovel lengje obezbedime 20 kontejnerija, t.e. montiribaskere barake kola so ka oven locirime ko pashipe e Chichino gaveske. O jekvakteskere khera ka oven chivde ki phuv koja so si taro sahibiluko e Ministeriumeskoro basho trud thaj socijalno politika. Basho o javera dzene si lengje dendo o shajdipa basho te oven chivde te dzivdinen ko Centro basho dzene bizo khera ki istono lokacija, so baro kotor olendar na lelakergje akava. Agar angja decizija o Ministeriumi basho trud thaj socijalno politika, numa o dzevapluko basho ulaviba e socijalno stanengoro prechudelale upral o Ministeriumi basho transport thaj phandina.

– Koa kava drom kamlape te sikavelpe thaj o inportantnost e komuengoro kola so jekajek e nadleznosteja dendno e Kanuneja basho lokalno korkorilegarin, shaj te prelen aktivitetija ko drom e obezbedibaskoro socijalno domuiba e dzenengje kola so si ko socijalno dar, sar thaj e Ministeriumeskor basho transport thaj phandina, dzikote o ulaviba e socijalno stanengoro kerelape prekal I postapka e sikavde sasuitnikane akharibaskoro palo drom kote so decizija anela I Komisija basho ulaviba e stranengoro, vakerelape ko dzevapi e Ministeriumeskoro basho trud thaj socijala.

Thaj dzikote o nadlezna phandena pire lafija kote te chiven e Romen taro teleder o Kale, odola 29 jerilukija sapanda dzivdinena ko pravdo, t.e. 121 dzene kolendar so 64 si chave, 10 bebija thaj trin dujevogjengere romnja. Ola achovena sapanda bizo khera sar so ki jekhutni akcija tari Diz Skopje thaj MTSP, ko augusto o nakhlo bersh sine pervade olengjere jekvakteskere khera.

– O institucie te na bistren kaj amen na sijam lengiri insititucija, numa amen sijam dizutnikane organizacie thaj keraja zorija barabarutneste e instituciencar te dalen arka. Taro augusto dzi akana nekozom biradjakere organizacie keraja I buti so kamlape te kerenla o institucie. E manushengje legaraja pani, hajbe, sheja, ilachija, dajalen medicinakere arke… Chachipnaske si rojbaskoro o tasfiri, kerelape buti basho chave. Odoborom li si o barvalipa e chavorikane dzivdipaskoro? Vakerela I Ljatife Shikovska tari biradjakiri organizacija Ambrela.

I chipota si gajleskiri thaj alarmantno sebepi o bilache shartija thaj o bichistlukoskere shartija sebepi so isi shajsariba tari dart e ikljoven hemime infekcijakere nasvalipna. I Diz Skopje o dzevapluko sapanda shudelale ko MTSP, prekal o Mashkar komunakoro centro basho socijalno bukja kaj kamlape te kerel gajla basho akala dzene.
O biradjakere organizacie tari javer rig, dena akhariba dzi ko nadlezna institucie so posig te arakhel halojbe odoleske soske o manusha si chivde te dzivdinen ko pravo, ko mangipa jali bimangipa e vakteskoro thaj e bivakteskoro. Ko hemsig vakti o nadlezna institucie te prelen konkretno napija, a ako kergjape mujal akava o manusha ka ikljoven ko protest.

You may also like...

Sorry - Comments are closed

Send as Kolumns





Full Name (required)

Your Email (required)

Category (required)

Upload File (required: .txt, .doc, .docx)

Captcha (required)
captcha