O Roma: Neve alosarina basho ikljoviba tari politikakiri kriza !!!

ВЛАДА

Sarine sijam svedokija sar I politikakiri kriza ki R.Makedonija taro 11to dekemvri 2016 bersh pa sa dziavdive, ovela sa pobari thaj pobari.

I Albanijakiri Platforma koja so avgo na sine andimi odoborom ko vakti kana o VMRO DPMNE kamlape sine te kerel radja e Albanijakere partiencar, a koja so avdive kerelape lake lafi ko baro hango, kana o SDSM kamlape te kerel I Radja, pekjalape kaj ovela o jek taro o sherutne sebepija so sapanda nashti kerelape I radja, sebepi baro protestija taro Tvrokorna thaj sebepi so nashti te konstituirinelpe o Khediba e R.Makedonijakoro veke 4to dive.

Bash akaja politikakiri kriza ki R.Makedonija, koja so kerela gajla thaj ki mashkardzijaneskiri jekhin sar sakanaskere dikhlarutne ko saste chipote, sine amari tema e Romencar kolen so mangljam te puchalen dali I politikakiri kriza darakerelalen, dali gndinena kaj ko sig vakti shaj te kerelpe o Khediba thaj palo odova I nevi Radja, jali palem gndinena kaj o hemshukar halojbe ka ovel o predlog taro VMRO DPMNE, te dzalpe ko neve angledervakteskere parlamentarno alosarina.

O Roma, kotor olendar, si ki dar tari I sasti chipota, kotor taro o dukjandzije vakerena kaj na kinena ni roba ko pire dukjanija dikhindor sar eskalirinela I sasti chipota ko, spremal olende, pobilache vaktija.

Numa javera pakjana kaj nane nishto te desinelpe thaj kaj o hemshukar ikljoviba tari sasti akaja chipota sit e hanguinelpe o Khediba, palo odova te vakerelpe oleskoro mukiba thaj ko istono vakti te dzalpe ko alosarina.

O Roma e Shutkakere dena akhariba dzi ko Romaneda legarutne te oven chivde ko saste procesija thaj pravde jakhencar te dikhen I chipota, a palo odova te ikljoven ko sasuitnipa thaj te den haberi pire nacija basho sa o shajdipaskere scenaarija, ki te shaj ko odova chane te cidelpe o Romano dzijani tari dar kaj ki rashtra o bukja, sar so ola vakerena, na dzana ko shukar.

O sasto amaro rodariba sikavgj ameengje kaj sa amare anketirime si ko jek stavi, a odova si kaj prekal ko alosarina ka halojvelpe I sasti chipota ki rashtra.

You may also like...

Sorry - Comments are closed