O lejbe than e Romengoro ko edukacijakoro proceso si inportantno poshukarkerdo, vakerena taro Biradjakere Organizacie !!!

СОНЦЕ

I chipota e Romengiri thaj olengoro lejbe than ki edukacija etapno ovela poshukar, sar esapi e proektengoro kola so kerenalen o biradjakere organzacie, esapinkerena o dzene kola so lele than ki rotirimi beshlarin anavkerdi sar “Poshukarkeriba e chipotakoro e Romengiri ko edukacijakere procesija”.

Tari biradjakiri organizacija “Sonce” vakerena kaj o numrija e Romengere so hramonenape ki fundavno thaj mashkaruni edukacija si but bajrardo. O asavko stavi ulavenape thaj o javera biradjakere organizacie kola so lele than ki istono rotirimi beshlarin.

– O chave polungo vakti arakhlovena thaj lena than ko siklane thaj but si poshukarkerdi I chipota olengere agorkeribaja hem e fundavno a hem thaj e mashkarune edukacijakoro. Bare zorencar e biradjakere kotoreskoro thaj e rashtrakere instituciengoro, esapinkeraja kaj taro sa o sektorija kote so shaj te dejstvuinelpe ki edukacija si hembut resardo thaj amen keraja buti te shaj te zojrakera o kapacitetija e jerilukongere te shaj te dzan thaj poodori te den ikerin bashi edukacija pire chavengiri, vakergja I Elena Mishik, tari fondacija “Piro palo piro – Makedonija”.

Ki rotarimi beshlarin lele than thaj sikavutne e biradjakere organizaciengjere taro Kosovo, kola so dengje ko hango kaj o Roma nane lelakerde ko olengoro sasuitnipa. Hembutdrom, sar so dengje haberi, ola si diskriminirime ko provesija e bukjardarnipaskoro thaj e edukacijakoro. Odothare pakjana kaj olengere aktivitetencar thaj prekal I nacionalno strategija basho poshukarkeriba e statuseskoro e Romengoro, I diskriminacija dzi ki akaja jekhin ka tiknarelpe.

– O bersh ko Tetovo nishanikeraja 28 Romane chave kola so vizitkerena gradinka, a 50 terne dzene si evidentirime kori amende sar studentija. Bari khelin te shaj te shurakerelpe numa thaj te agorkerelpe I edukacija isi e mentorengere programa kolaja so delape arka basho o Romane sikle sar thaj I istono arka delape lengje basho o stipendistija mashkarsikle Roma, vakerela I Merita Mustafi, proekteskoro menadzeri bashi edukacija ki biradjakiri organizacija “Sonce” taro Tetovo.

Isi shukar kohezija mashkar o biradjakoro sektori thaj o institucie so esapinkergja e poshukarkeribaja e chipotakoro kana si ko puchiba I edukacija kori o Roma, vakerena o dzene ko lena than ko proektija.

– Taro 2004 bersh isi but ko numero thaj zojrakerde aktivitetija bashi inkluzija e Romengiri ki edukacija. Resardo si but sar ko individualno nivelo ko sikle, agar thaj ko sasuitnikano nivelo. Inportantno si I ikerin so ko hemime proektija lajala taro jerilukija e siklengere, vakerela I Elena Mishik, tari Fondacija “Piro palo piro”.

You may also like...

Sorry - Comments are closed