O dat e Romane mule phanle chaveskoro: Mudargjemandar me chave taro mariba ko phanlipa !

ИДРИЗОВО

O dat e 21 bershengere Romane chveskoro Andrias Redzepov taro Shuto Orizari, kova so angleder 4 divesa mulo ko phanlipe ko Idrizovo, vakerela kaj isile sumliba kaj o dzene taro sluzbe ko phanlipa si bangje basho oleskoro meriba. Ov rodela ko sig vakti te rosharelpe I chipota thaj te arakhenpe o chachkane sebepija basho meriba, odoleske soske navodno, sine svedoshtvija taro anonimno phanlo dzeno kova so zojrakerela sine kaj o chavo sine premardo taro komandirija.

– O amala mire chaveskere taro phanlipa javingjepe mangje kaj mo chavo si ko hospitali. Kana reslum ko hospitali na mukleman te dikhavle. Palo odova, kana geljam ko phanlipa ko Idrizovo, dengje amgnej haberi kaj mo chavo si mulo, odova sine barho shok amengje. Angleder duj divesa parungjam jekhe mire chave, numa akana mi gnd si sakana ko dujto, 22 bershengoro chavo kova so achilo ko phanlipa ko Idrizovo, darava te na ovel diso leske da, vakerela o Nehru Redzepov, o dat e mule Romane chaveskoro.

Taro Evropakoro centro basho nijamija e Romengere ERRC, tari Budimpeshta, vakerena kaj ushtimaleste dikhena I chipota e mule 21 bershengere chaveskiri.

– Sa resarinaja ko sig vakti te raskoselpe I chipota, o ERRC hazrkergja pismo thaj taisa ka ovel bishaldo dzi ko sa o nadlezna institucie thaj ka rodelpe ko sig vakti te sikavenpe oficialno sikavina bashi I chipota, sar thaj te shurakerelpe sig vakteskiri rodarin ko SAsuitnikano doshalkeriba e R.Makedonijakoro palo sluzbeno drom, thaj obezbediba nijamutni kompenzacija thaj ikerin e jerilukoske e mule chaveskoro. O ERRC ka dzal thaj poodori ushtimaleste te dikhlarel sa o chipote kola so ka aven tari akaja chipota thaj ki chipota e naprofesionalno thaj nakovakteskoro keriba e duglipaskoro e nadlezno badanengoro, ka ana rojbe anglo o nacionalno thaj mashkardzijaneskere adalatija, vakerela I nijamutni dzejni Senada Sali, taro Evropakoro centro basho nijamija e Romengjere, Budimpeshta.

Taro Helsinshko komiteti basho manushikane nijamija dengje piro rodariba dzi ki Komisija basho rahatlimo avipa basho informacie taro sasuitnikano karakteri, te len podatok kozom phanle dzene mule ko palune trin bersha ko sa o phanlipaskere thana ki Makedonija. O nijamutno konsilmeni e Helsinshko Komiteteskoro, Voislav Stojanovski, vakerela kaj najbaro problemi ko phanlipaskere thana si o prenatrupiba thaj o nanipa e medicinakere personaleskoro. Ov dzivakerela kaj basho jek kreveti ko phanlipa isi po but phanle dzene thaj o medicinakoro personali nashti te resarel te ikljovel lengje ko anglederdikhiba sarinengje, odoleske soske kerena buti salde ki jek trampa.

You may also like...

Sorry - Comments are closed