Nekozom 10 Roma dzivdinena prekal khediba plastika ki deponija ki Struga

STRUGA

I jag achavdili, numa o problemi e deponijaja thaj poodori si akate. Bershencar o zatrupimo gunoj tari sasti Struga nashti prekal rat te hasargjovel.

I divo deponija si dur salde nekozom 100 km taro o trujale khera kote so dzivdinena o stugakere dizutne. Sar avelape popashe dzi ki deponija, I planina taro gunoj ovela sa pobaro, ko disave thana ushtela dumani thaj lungokerelape bizo podnesibaskiri khant.

Ki kupa, chudelape sine sa. Taro purano mebel, medicinakere gunoja, leshija taro dzanvarija pa sa dzi ko plastikakere shishija.

O gunoj akate anelale o komunalno pretprijatije tari Struga, chudelale thaj iranelape napalal pali nevi tura. I deponija koja so tasavela e Struga akate si nekozom 10 bersha. Lungo si 700 metre, buvli 300 a uchi 13 metre. Ko bersheskoro nivelo ki olate chudenape sine 130.000 metre kubno gunoj.

E deponijaja ko 2014, 2015 thaj 2016 bersh stopanstvuinela sine I firma D&B grup 2013 DOOEL. Basho ikeriba e deponijakoro akaja firma ko nakhle trin besha kasiringja 200 mile evroja.

Ko hemucho kotor tari I planina taro gunoja, koja so si raschudimi trujal nekozom thana, nekozom 10 Roma khedena thaj selektirinena plastikakere shishija. Ola vakerena kaj sekova dive avena akate, khedena thaj selektirinena plastika koja so palo odova bikinenala.

I deponija basho o strugakere dizutne si jek kerki rana, numa basho o Roma kola so avena tari sastip Makedonija, pa chak hem tari Albanija oj sikavelape sar avipa olengoro dzi ko jek kotor maro.

O Roma dzanena kaj si darakeribaskoro te randen palo gunoja, numa vakerena kaj nanelen javer alosariba. Nanelen buti, a taro diso kamlape te dzivdinelpe.

O problemi e deponijaja sapanda nane halovdo, a o struzanija sekova dive ikljovena ko protestija angli I komuna thaj rodena I deponija te phandelpe thaj te arakhelpe nevo than basho gunoj.

Palo nekozom divesengoro intenzivno lakoro thariba, I deponija ko savatone sine achavdi. O Ministerija basho dzivdipaskoro than thaj bizo resori nekozom divesa avena ki Struga ki te shaj te den arka ko halojbe e problemeskoro e deponijaja.

Numa akanaske haloviba nane. O dizutne dzana thaj poodori e protestencar thaj havlarena radikalizacija dzikote na arakhelape nevo than basho khediba e gunojeskoro, a I akanaskiri deponija te ovel phanli.

You may also like...

Sorry - Comments are closed