Arka bashi I thari gradinka ko Shuto Orizari

ГРАДИНКА

Ko shuru taro mart akava bersh ki jag I gradinka ko Shuto Orizari sakosa thabili. Pendjarde fotografija tari Makedonija ko na but nakhlo vakti sikavgje pire umetnikane kotor ko jek skopjeskoro kafule, sa resarinaja te kheden strestvija basho olakoro nevjakeriba. O organizatori, tari dizutnikani inicijativa “O manush angleder sa” pakjala kaj o institucie thaj I rashtra ko sig vakti ka arakhel halojbe akale problemeske.

– E korkori tharibaja odole centroskoro, jek bari kupa taro terne chave, kola odori arakhena piro than thaj konsili, pa phejrarena sine thaj pire diveskere zarurina sar diveskoro centro basho chave taro drom, akana ola palem achile ko droma. Amen pakjaja kaj, e shukar manginencar e shukar manushengjere thaj sa akale umetnikane tasfirencar, ka shaj te da ark ate nakhavelpe akava momenti, dzikote o institucie na kerena buti odova so si ko olengoro savalipa, vakerela o albert Musliu – tari organizacija.

I komuna Shuto Orizari e vaslegarutne dzenegje tari thari gradinka, o kotor basho chave taro droma sar centro, dengjalen, sar so vakerena, basho jek vakti te kulandinen o thana e Sastipaskere khereskere ko Shuto Orizari, numa ola na lelakergje odova.

– I komuna Shuto Orizari nane nadlezno bashi sanacija basho Diveskoro centro basho chave taro droma thaj amari sherutni resarin si I chavorikani gradinka 8to april. Amen sar komuna, keraja buti ko ikaliba e thare bukjengoro taro than, sa resarinaja te shaj te kerala posig thaj te chiva e chaven andre. O objekti kova so thabilo. Nane te sanirinelpe, odoleske soske zaruri si nevi zgrada. I komuna Shuto Orizari nudinela e Diveskere centroske basho chave taro droma, kotor taro o thana e Sastiapskere khereskere ki amari komuna, numa ola na lelakerena. Dzikana na denape shukar shartija, o chave tari gradinka, taro than basho centro basho chave taro droma, ka oven khere, vakerena tari komuna Shuto Orizari.

Basho keriba gajla e terne dzenengje taro Shuto Orizari kerela gajla thaj I biradjakiri organizacija “Ambrela” koja so smetinela kaj akana ki scena kamlape te avel o Ministeriumi basho trud thaj socijalno politika, paluneste basho o chave taro Diveskoro centro:

Akala chave si chivde ko dijek organizacie, kote so thaj amenda sar organizacija, nudingjam amare kolegenge, te shaj te kulandinen amaro than ki te shaj te dzan thaj podori olengere dzajbaskere poodori aktivitetija, sa resarinaja te delpe arka odole chavengje, vakerela I Ljatifa Shikovska.

Dzikote na arakhelape halojbe, o chave kola so sine hemime aktivitetencar angazirime ko Diveskoro centro, salde te shaj te na mangjen devlengje thaj te na arakhenpe nisave edukacijaja, ka oven chivde ko javera biradjakere organizacie. Numa dali o than e saste unishtime edukacijakere khereskoro ko centro e kupatnakoro ko sig vakti ka ovel vazdimo sar nevo objekti basho akala terne dzene, akanaske khoni nashti te vakerel.

You may also like...

Sorry - Comments are closed