Mefail Ibov Rio, jekhutno Rom ko Shtip kova so sapanda kosela menie

KONDURI

Kana bi na ovela o 52 bershengoro Rom anaveja Mefail Ibov – Rio, o Shtip ko purano thaj o nekanaskoro na odoborom but retko zanaeti – kosutno e meniengoro. Sekova dive, sem ko puranekurke, pire dolapeja, pire chetkencar thaj kolorencar basho o menie taro 08 o ari dzi ko 13 o ari akava Romano zanaetchija sine locirimo anglo o Dizjakoro kinobikinibaskoro centro, a ko palune nekozom chona, sebepi so kerenape bukjarne aktivitetija ko GTV, oleskoro than akana si 100 metre podur taro o sakanaskoro, ko trotoari trujal o thavdipa e lejnakoro Otinja.

– Akava zanati achilomangje taro mo dar o Demir Ibov, kova so but drom kerela sine buti ki Avtobuseskiri stanica. Tegani ko Shtip sine pobuter dzene so kosena menie, a taro miro jeriluko sineman thaj kako so kerela sine akaja buti. Akana ov mulo. Salde me sar agaar ikerava o zanati – vakerela o Romano Mefail, popendjardo sar Rio. O anav Rio lelale ko nabutnakhlo vakti, sebepi so si but jek mujeskoro e istoanavkerde mujeja e nekana popularno televizijakere srijaleskoro “Trst via Skopje”.

– Sakana kana nakhava akatare, kosava mire menie, pa thaj teganida kana nane meljarde. Iranenape mangje o gndimale vaktija, numa thaj sekova jek chisto manush hembut prependjarelape taro oleskere menie. Basho rojbe veke si buti retko o manusha kola so legarena esapi e menijenge te oven chista. Akana pobuter dikhena te oven chista olengere vrdona nego olengere menie, pa ko Shtip isiamen nekozom 20 servisija basho thojbe vrdona, a salde jek dzene kova so kosela menie – vakerela jek dizutno.

O Rio vakerela kaj isilen panda 5-6 mushterije kola so avena nichaleste te kosen pe menie, a hemnichalo si jek sikavno, kova so avela sekova dive thaj sakana kana avela oleskere menie si chista. – Rosharker mire menie tire kolorencar hari, neka parlainen, a thaj agaar da, me preja upral o dolapi, osetinavaman sar rajo, vakerela leske o sikavno sekova dive.

– Ko dive isiman hembut dzi ko 10 mushterije. Hasardili i tradicija. Naneman moldija, koj kozom resela dela. Hembut drom mukjena mangje po 20 – 30 denarija. Me sijum shukrakerdo, akoda salde odole lovencar na dzivdinelape. Isiman duj chave, chaj thaj panch unukija, isilen pire jerilukija, a me dzivdinava me romnaja thaj jekhe mire unukoja, pa te shaj te achova dzivde, kamlape thaj dzipherdeste te kerav buti, vakerela o Romano kosutno e meniengoro ko Shtip, o Rio.

You may also like...

Sorry - Comments are closed

Send as Kolumns





Full Name (required)

Your Email (required)

Category (required)

Upload File (required: .txt, .doc, .docx)

Captcha (required)
captcha