Korkorutni Romani daj pire ofto chavencar dzivdinela ki koliba taro daske thaj najloni

ROMI BEZ DOM

Dzivdipa zaglavimo ki kutija, ki sapani phuv, telal ki pravdi havaja. Agar shaj te vakerenpe o shartija kolende so dzivdinela i 9 dzenengiri Romani familija Durakovi.

Ki temperature teleder o zero, 8 chave thaj olengiri daj sovena ki phuv, a upral o shero isilen najloni kova so si pharo taro o iv thaj o brshim so ko nakhle divesa pele. I korkorutni daj anaveja Abdie thaj olanere chavore ko suno dikhena kher thaj pravde jakhencar, odoleske soske i koliba kolate so ola ko momenti dzivdinena si sakana biroshalimi.

I Durakova si daj bizo kher, 5 bersha dzuvdinela ki improvizirimi koliba taro daske uchardi najloneja. Ola dzyvdinena sakosa bizo struja, bizo pani thaj bizo hajba.

I daj arakhelape pes thaj pe chaven e socijalno arkaja koja so legarela trin mile denarija. Poangle lela sine vakertuke 6 mile, numa taro nabutnakhlo vakti, o legariba e lovengoro si latar chovnavdo basho 50%, odoleske soske si kulanduvachi e socijalno arkakoro polungo taro duj bersh.

O rom akale 38 bershengere romnjakoro si lungo bersha ko phanlipa, a arka nanela ni taro piro 19 bershengoro chavo, odoleske soske ov na shunela ni na kerela lafi thaj na pendzarela i isharetengiri hip, pa i komunikacija e trujalipaja si oleske but phari.

Ko akava jeriluko isi panda jek chavo palune zarurinencar, i 18 chonengiri bliznachka, koja nashti te mrdinel po vas thaj po pirlo, numa basho olakoro saslariba, i Romani daj nanela love.

O komshije, dena i hembari arka akale Romane familijake, ola denalen arka te shaj te krpinen po disavi phajrarin tari olengiri koliba, jali te kheden lenge po disavi prachka takaribaske, numa dena thaj apel dzi ki rashtra te arakhen o agor akale Romane dajakoro, koja so pe chavencar dzivdinela telal ki pravdi havaja.

I Romani Abdie rodela nekoj te rovelpe upral lende, rodela hari tatipa thaj pakiv ko nevo bersh. Olakere chave nikana na lele pursakija, i pursakongiri magija thaj o svetilke hembut dikhenalen kana dzana te mangen devlenge ki diz.

I 38 bershengiri Romani dzuvli thaj o chave sovena ki sapani phuv ko temperature kola so si teleder o zero, i rashtra bashi lenge nashti arakhela thaj dzivdipaske. I Abdie Durakova rodela hari pakiv thaj arka ko nevo bersh.

You may also like...

Sorry - Comments are closed

Send as Kolumns





Full Name (required)

Your Email (required)

Category (required)

Upload File (required: .txt, .doc, .docx)

Captcha (required)
captcha