Komuna Ruma: O Roma na mangjena lengjere komshije te oven Roma ?!

RUMA

O Romane jerilukija tari nalegalno kupatni Rupa ki komuna Ruma ki Srbija nashti te len montiribaskere khere ko droma trujal o kurko e Rumakoro, odoleske soske 80 dzene, hembaro kotor olendar Roma, peticijaja shajsargje te achaven o avipa te dzivdinen ko olengoro than o preperutne e Romane nacionaliteteskere ko lengoro drom, thaj praktikane, o Roma e Rumakere na mangjena o neve olengere komshije te oven o Roma.

I lokalno korkorilegarin adzikerela te kerenpe revizije e urbanistikane planeskoro, sar thaj te halovelpe o khereskoro puchiba ki akaja Romani kupatni.

I komuna Ruma panda ko 2010 bersh sinela phanlolafi e donatorencar tari Danska thaj Norveshka basho o Roma tari Rum ate shaj te kerenpe lengje 35 montiribaskere khera ko thana taro 37 metro kvardateskere, ki te shaj 212 Romane duzitne tari akaja nalegalno kupatni koja so arakhlovla kaj I deponija te cidenpe odothare thaj te ovel len normalno shartija basho dzivdipa.

I Marina Tarik dizutne tari Ruma sine inicijatori bashi I postapka e namukibaskoro basho avipa e Romengoro te dzivdinen ko mesno than Rupa, thaj vakerela kaj na kerelape lafi bashi disavi rasakiri jali nacionalno nasajgija, odoleske soske oj korkori si prandimi ko Rom, numa andinela kaj odova kerenale odoleske soske odova kotor e dizjakoro nane anglederdikhlo te mukelpe basho dzivdipa.

– O Roma tari kupatni Rupa isimen kerdo khera, thaj kamlape te anelpe lengje pani, kanalizacija thaj te dzan thaj poodori te dzivdinen odote, odoleske soske ola hempobuter kerena buti ko khediba sekundarno surovine, vakerela I Marina.

O keriba e montazno kherengoro trujal akaja kupatni ka anel salde problemija, odoleske soske o Roma thaj o javera kola so si purane beshutne ko odoja komune pakjana kaj odola manasha, jali o Roma, ka nane te ovel len than kaj te kheren pire sekundarno surovine, a odova si olengoro jekhutno avipa dzi ko love, thaj ka shurakeren te ikljoven akoshina olendar sebepi o gunoj thaj o hausi so ka mukenle amengje, vakerena o Roma.

You may also like...

Sorry - Comments are closed