Ko than te delpe zijanikeriba basho o Roma kola so sine otruime ko Kosovo, o OON ka finansitinel proektija

OON

O Plani e OONeskoro ko than te del zijanikeriba, te finansirinel proektija basho o kosoveskere Roma, anglederangja kritike taro biradjakere organizacie kola so kerena buti upral o nijamija e manushengere. O Stefan Dizirik, oprtparoli e generalno sekretareskoro ko Pashakerde Nacie, Antonio Guteres, ko panchtodi dengja haberi kaj akaja organizacija si sakosa ki gnd basho o muke e kosovsko Romengere kola so sine otruime ko vakti kana o Kosovo sine telal ki legarine Pashakerde Naciengiri, kola so si direktno kurbanija e achovinengere e kotakati paldibaskoro len ko kampija basho andrune raselime dzene, kola so sine chivde ko Utarig Kosovo.

O Dizarik dzivakerela kaj mangela te siakvel piro hor rojbe dzi ki organizacija basho o muke so dodzivdingjelen sa o pojekhutne dzene kola so dzivdinena sine ko odoma Andrune Raselime Dzenegere kampija. O nakhlo bersh, o Konsileskoro dejbaskoro paneli basho manushikane nijamija, kerdo sar badani kova so rodarela o sikavina basho zijanikeriba e manushikane nijamengoro kola so prechivenape ko puko e misijakoro e OONeskiri ko Kosovo, dengja haberi kaj o OON kamlape te esapinkerel e UNMIKe basho dzevaplimo, odoleske soske o Romane jerilukija sine ikalde ko otruiba ko kampija kerde basho o dzene raselime sebepi o mariba ko Kosovo ko 1998 dzi ko 1999 bersh.

O kampija basho andrune raselime dzene sine vazdime pashe dzi ki topilnica Trepcha, kolake so panda taro 1970 bersh dzanelape kaj si sebepi basho zagadiba e pashutne thanengoro thaj odova prekal olovo thaj javer dikhina e toksichno zagadibaskere.
O kampija kamlape sine te obezbedinen salde jekvateskoro than basho dzivdipa odole Romengoro dzi ko 90 divesa, numa ola sine pherde nekozom bersha.

O paneli akhargja e UNMIKe javno te priznainel piri bangin thaj te usoglasinelpe e fundavno standardencar basho manushikane nijamija, sar dzevapi e negativno sastipaskere shartencar kola so sine anglederande taro olovo ko kampija basho raselime dzene, sar thaj te pukinel konpencazija e kurbanenge, basho materialno thaj moralno zijani. Sapanda, o OON angja decizija te kerel fondi basho lokharkeriba e inicijativakoro ki jekhin, sa resarinaja te finansirinel ko proektija bashi asistencija sherutneste ko Utarig thaj Mesmerig kotor e Mitrovicakoro thaj ko Leposavik, kolendar so, spremal o OON, kulandipna ka ovel len o Roma, Ashkalie thaj Egipjanija.

– O proekti bashi asistencija ka fokusirinelpe ko hemprioriteteskere zarurina e hemratvarde jekhinakere, chijbaja akate o sastipaskere usluge, ekonomijakoro bajrovipa thaj infrastruktura, vakerela ko havlariba taro Dizarik. Akava piro kritikuinenale o organizacie basho manushikane nijamija, kola so dengje haberi kaj kerelape bizofundakoro fondi basho proektija bashi arka e jekhinake, ko than te ispukinelpe lengje individualno zijanikeriba e kurbanengje basho olengoro otruiba. Agaar, o Human rajts voch esapinkerela kaj o OON bikinela e kurbanen kola so sine otruime olovoja ko kampija ko Kosovo.

You may also like...

Sorry - Comments are closed