Ko Kichevo nishanikerdo o Sumnaleskoro dive e Romengoro

KICHEVO

Kulturakere-umetnikane programaja avdive anglo o plato e Khereskoro e kulturakoro ko Kichevo agorkergja I manifestacija telal ko sebepi 8to april, Mashkardzijaneskoro dive e Romengoro.

O aktivitetija basho nishanikeriba e Mashkardzijaneskoro dive e Romengoro shurakergja irati e vazdibaja e Romane bajrakoskoro ko jarboli angli I komunakiri zgrada, sar thaj e proslavaja koja so geli poodori e poetsko drabaribaja kote so lele than poetija taro sa o etnikuimija kola so dzivdinena ko regioni.

Anglo o dzene so lele than ki manifestacija kergja lafi o prezidenti e Amalipaskoro e terne Romengoro thaj Romajna “Palembijaniba” taro Kichevo, Emin Mamudoski, kova so sikavgja shukrakeriba dzi ko dizjakorosherutno Fatmir Dehari.

– Akava si dujto bersh so bash o dizjakorosherutno kerela amengje sajgija thaj delaamen shajdipa te vazda o Romano bajrako angli I komunakiri zgrada, vakergja o Mamudoski, palo so irangjape thaj ko istoristikano chan e slavibaskoro akale diveskoro.

Ko svechanost kergje lafi thaj o prezidenti e Konsileskoro e komunakoro Kichevo, Kemal aliu, kova so bahtakergja o bidjuko e Romengoro thaj mangjal lengje sa najshukar. OV vakergja kaj o Roma zasluzinena but pobuter thaj ko avutnipa kamlape te marenpe basho pire nijamija sar etnikum kova so dzivdinela ko akala thana.

You may also like...

Sorry - Comments are closed