Ki Bitolakiri Kartonengiri Mahala o khera e Romengjere thablona sar ki khelin !!!

I dujvogjengiri bitolakiri Romani daj Emina Bajramovska duje tiknebershengere chavencar dzivdinela palo droma. Agar si sar so angleder jek chon thabilo olakoro phagerdo kher, thaj akaja oj sekova dive arakhelape darakeribaskere bidjandipaja basho odova kote ka arakhel siguriteti basho pire tikne bershengere chave. Jek olendar isile jek bersh, a o javer salde so phergja duj bersh. Ko anglederalosaribaskoro vakti kana o politicharija dena sine lafi ko avtodroma, sastrnale pruge, prosekoskere plate, bukjardarnipa, I Emina nanela ni kher, ni buti. Ki bitolakiri Kartonengiri Mahala kote so arakhlola olakoro phagerdo kher, avdive odoja mahala si than e prahoskiri, o dende lafija basho poshukar dzivdipa e politicharengoro angleder o alosarina dikhlovena sar naukakiri fantastika bashi lengje.

– Kerelape lafi bashi disavi uchi politika, dzikana o chorolo dzijani marelape basho jek kora maro. Te dav sine mo hango nasineman soja. Mi lichna karta thabili barabar mire khereja. Numa thaj te ovel la man da sine, nane te ikljovav sine ko alosarina. Khoni na delaman arka, dzava taro institucie dzi ko institucie, sarine vazdena pe pike, a mo rom si ko phanlipa thaj nashti delamen arakhin. Kurkencar sijum bizo chatija upral o shero duje chavencar. O tritono chavo si mangje ko vogi, barem ov si arakhlo, vakerela I Bajramovska.

O nakhlo kurko o dziutne taro duj iraniba blokiringje o regionalno drom Bitola Resen odoleske soske achile bizi struja, pa protestiringje chijbaja bara thaj vrdonengjere gume, a ko drom thargje thaj jag. Akava kotor taro bitolakoro Bairi, kova so arakhlovela taro duj riga e dromengoro Prilep Resen, anavkerelape sar Petokoskoro pani. Ki kupatni dzivdinena trujal 2000 manusha tari Romani etnikani jekhin, ko salde 80 kherora tari desno rig e dromeskiri.

 

20 Romane dizutne ki akaja choroli kipatni koja so kergjape upral o magistralno drom ki Bitola, a o khera kerenalen taro so ka arakhen, trujal blokija thaj malteri, kulandinena lamarine, kartonija, thaj javer lokheste tharibaskoro materijali.

Sar so lokheste shaj thablona o kartonija, agar lokheste thablovena thaj olengere khera. Pobuter taro o Roma si ko divo chivde ko elektrikano netvorko, pa anglederanena problemija ko napoiba, a na hari thaj pozarija. I jag angleder nekozom chona gltingja thaj o dzivdipaskoro than e romane dzuvljakoro Amida Demirovska, koja so oj si daj 4re tikne bershengere chavengiri. Arakhle si bishajdipaja te keren gajla thaj te chalaren pe chave, thaj odova sebepi e hemtikne chave dengjale ko domi basho chave kola so posvoinenape.

Thaj ko agor, angleder nekozom bersha havlargjape perajbe e karton mahalakoro, a ko lakoro than te kerenpe shukar khera lovencar taro fondija e EU. Numa, dzi avdiveda akaja karton mahala achovela salde ko dende lafija.

You may also like...

Sorry - Comments are closed

Send as Kolumns





Full Name (required)

Your Email (required)

Category (required)

Upload File (required: .txt, .doc, .docx)

Captcha (required)
captcha