Ki bari jag thabilo o jekvakteskoro kher e Romengoro taro Shtip

STIP

50 Roma, kolendar so pobuter taro ekvash sic have, o avgo dive taro o nevo bersh nakhavgele ko pravdo sar so javinakoro ko 1to januari, angleder 5 o ari, jag tharga i zgrada e poanglutne nervno psihijatarsko oddelenieskiri ko Klinikakoro hospitali ko Shtip, kote so o Roma basho jek vakti djivdinena sine. I jag iklili taro o krovi thaj taro o khujbaskoro udara kana o Roma sovena sine, a 14 jerilukija ko sig vakti iklile avro. Numa spremal olengoro vakeriba, i jag sine odoborom takatlimi so but sig astargja sa o kotora e zgradakere.

– Sovaja sine kana shurakergja i jag, prastandilam, akhargjam mujaljagakere djenen, achavgjam i struja. O mujaljagakere djene ale ko sig, akana adzikeraja taro dizjakorosherutno thaj taro o deputatija te denamen arka. Nanenamen khanchi, sa thabilo amendar, vakerga o Erbihan Demirov, jek taro o Roma so djivdinena sine ko klinikakoro centro.

Kana iklili i jag, o temperature sine dujl digde teleder o zero. O chave sine salde ko kundre, bizo kalcunija. Sine thaj romnja kola so sine ko duj vogja, sar thaj pobuter pherdebershengere djene. O stanarija sumninenap kaj i jag iklili prekal chivdo benzini. – Isiamen problemija jekhe djenenja, koleja so sijam ko adalati basho mariba thaj ov si pendjardo e djandarmerijake. Ov khuvela amen sine barencar thaj dela sine amengje takati kaj jek dive na tharelamen. Jek drom atakuingjaamen, amen irangjamleske e korkoriarakhibaja amen thaj akana sijam ko adalati, vakergja o Demirov.

I konsilmenka i Enisa Demirova sine i jekhutni koja so vizitkergja thaj koja so evidentiringja e jerilukon so achile bizo hatija upral po shero. – Akale jerilukonge sar interventno arka kamlape lengje hajbe, sheja thaj khebe. Ka iranaamen dji ko lolo trushi thaj dji ko sarine so shaj te den arka akale manushenge, odoleske soske ola si mukle ko mangipe thaj bimangipa. 50 djene Roma si avrial telal ki pravdi habaja, vakergja i Demirova.

Ko jek taro o thare objektija, ki sitno jag thablola sine dji ko agor jek mebel. O mujaljagakere djene salde so agorkerjge pe bukjaja gelepeske. Jek olendar pelo ko ledo thaj si prelengardo ko hospitali sebepi o phagerdiba ki rebra. O sasto kompleksi kote so si chivde o Roma, nekanaskere bizokherengere djene, si bizo struja thaj bizo takjarba. O dizutne dena apel so posig te ovel lengje mukli i struja. Bishalghe apel basho sig jekvakteskoro kher bashi lenge. Komuna bashi lengje planirinela te kerel socijalno zgrada ki kupatni Cherenja, bashi kolake si anglederdikhli lokacija, numa taro Ministeriumi basho transport thaj phandina, spremal i konsilmenka Enisa Demirova, o proekti nane lelakerdo.

You may also like...

Sorry - Comments are closed

Send as Kolumns





Full Name (required)

Your Email (required)

Category (required)

Upload File (required: .txt, .doc, .docx)

Captcha (required)
captcha