Inicijativa: Kanuneja te na mukelpe o keriba tiknebershengere prandina

MOLDAVIJA

O tiknebershengere prandina, kola so hembut jali skoro sa kerenape mashkar o Roma, si but dromeskiri ikljovin ki diz Prilep. Taro centro basho socijalno bukja vakerekana kaj o problemi si kompleksno thaj kaj kamlape te anelpe kanuni basho namukiba te khuvelpe ki prandin teleder o 18 bersha. Hem o biradjakere organizacije, chivindor thaj o Romane, rodena tranpe ko kanuni. O 47 bershengoro prilepchanco Fako Jaoski si buti revoltirimo, odoleske soske ki rashtra nane kanuni koleja so garantirinelape I arakhin basho tiknebershengere chaja, ki te shaj te na mukenlen te khuven ki prandin sa dzi ko olengere pherde bersha. Ov sinele but nashukar dodzandipa trujal o institucie ki mangin te iranel pe chaja khere, koja so ko 14 bersha khuvgja ko avrial taro prandibaskoro jekhipa vakertuke duj drom pobare romeja. Aljum mangje tari Avstralija, mukljum I buti, I chaj sine prandimi basho pherdobeshengoro rom, kova so sinele 27 jali 28 bersha. Thaj odova kotor, sebepi so I chaj si tiknibershengiri , kamlape kanuneja te mukelmangje te iranavla napalal, a ola na lelakergje miro rojbe o institucije. Me salde sijum dzalo tari dzandarmerija, chachipnaske lelela taro odova rom thaj irangjela ki lakiri daj, vakerela o Jajoski.

I asavki jazija e Jajoskeskiri ko Prilep ulavenapa panda but javera Roma. Taro Centro basho socijalno bukja, vakerena kaj akava problemi sine akate taro sakana, thaj kaj odova si kotor tari tradicija e Romane jekhinakiri. Numa kerela baht I sikavin so, sekova bersh bahrovela o numero taro chaja kola so dzana poodori pire edukacijaja ko mashkarune siklane, a odova si esapi e pozitivno tranpemgnro. Akanaske, sar so sikavela I sherutni e Centroskiri, Snezana Jovanovska, rojbaskoro si so but si tikno o numero e jerijengoro, kola so reagirinena thaj rodena olengere tiknebershengere chave te iranenlen taro olengere mangina te khuven ko agar vakerde chavorikane prandina. – Sa okola mukina asavke prandinengoro kola so si dende, sa si okola ki chipota kana I chaj si ko duj vogja. Tegani hem te delpe a hem ma te delpe mukiba, sa si jek.

Ako na delape mukin bashi prandin ka nane te oven tiknebershengere prandina, numa ka ovel avrial taro prandinakere jekhina. Numa, odova chavo kova so si ko drom, poodori ka ovel le javer problemija. Me seljaminkerava I idea te anelpe kanuneskoro halojbe, duri te na mukelpe prandin dzi ko 18 bersha, vakerela I sherutni Jovanovska thaj dzivakerela kaj ko sa akala chipote o tiknebershengere prandime si bishalde ko Konsileskoro than basho prandina, sa desarinaja kozom so isi shajdipa te prevenirinelpe o sijanija thaj o achovina.

Sem ko Prilep thaj ki Romani jekhin, o chipote e tiknebershegere, chvorikane prandinengoro isi thaj ko but dizutne taro javer nacionaliteti ki rashtra. I biradjakiri organizacija ROMA SOS sa resarinaja te poshukarkerel o kvaliteti e dzivdipaskoro ko terne, a cidibaja tari Konvencija basho arakhiba e chavorengere nijamengoro, spremal kolate so o dzene dzi ko 18 bersh si chavo, isile mesazija sojrakerde e adalateja ki chipota. Tari akaja biradjakiri organizacija, andinena kaj o Rashtrakoro konsili bashi prevencija e chavorikane pretpranshnistvoskiri, sar esapi olengere aktivitetengoro, angja Inicijativa dzi ko Ministeriumi basho nijamija basho tranpe ko Phagerdipaskoro kanuniko, sa resarinaja te oven sankcionirime okola pherdebershengere dzene, kola so ka muken te khuvelpe ki prandin ko tikne bersha. – Adzikeraja ko hemsig vakti thaj o Ministeriumi basho nijamija te ikljovel pire lafencar. A, odma palo odova ka aven o inicijative ko Ministeriumi basho trud thaj socijalno politika thaj edukacija, sar sherutne institucie, kola so kamlape ko pire pervazija, ko pire kanunija, te keren dijek trampe, ki te shaj sakosa te harmonizirinelpe o kanuneskorodejbe thaj te obezbedinelpe sakosaskiri arakhin e chavengiri ko phejrariba olengere nijamengoro, vakerela I Nesime Salioska, tari biradjakiri organizacija ROMA SOS, taro Prilep.

You may also like...

Sorry - Comments are closed

Send as Kolumns





Full Name (required)

Your Email (required)

Category (required)

Upload File (required: .txt, .doc, .docx)

Captcha (required)
captcha