I historija bashi i choroli, numa sapanda bahtali mahala ,,TOPAANA,,

TOPAANA

Zamanencar napalal o Skopjeskere Roma taro shalitre kerena sine eksplozivija, pa agaar olengoro than kote so dzivdinena sine dengjape leske anav sar Topaana, kova so avela taro taro lafi Top – topeskoro orudie thaj taro lafi Han – than basho beshiba jali khera ki Topaana. Akaja mahala arakhlovela ko than purano anavkerdo sar Tahta Kale ki periferija e dizjakoro mashkar ko Evrejengoro, Pajko thaj ko Chair Maalo thaj ko drom kova so lgarela dzi ko Tetovo thaj Kachanik. Akaja Romani mahala sine panda taro purane vaktija kerdi ko terno sokakija ucharde kaldrmaja. Palo o Khoraja, ki akaja mahala ale te dzivdinen o Roma, pa taro tegani dzi avdive i Topaana esapinkerelape kaj si Romani mahala.

O korkori anav Topaana isile interesno historija. Ko nakhle vaktija o skopjeskere Roma kerena sine phare fizichko bukja. Trujal o javer, ola tari shalitra kerena sine hemime eksplozivija, thaj odovada sebepi olengoro than e dzivdipaskoro si anavkerdo sar Topahana. Spremal nekola avina, ko Skopje panda ko 15to zamani sine dukjanija basho keriba topija. Ko gav Jurumleri sine barutana, koja so, isto agaar, uli ki kalhana.

O keriba e shalitrakoro na sine karakteristikano basho Skopje, numa ole angjele o Khoraja. O Roma tari Topaana jali Topaana sine shukar bostandzie, arakhutne e tutuneskere, afioni, a kerena sine buti thaj javere phuvjakere kulturencar telal ki kirija. Ola e zamanencar napalal slavinena sine hristijansko bidzukija. O dizutne e Topaanakere khedena sine o pani ko bukalija tari phuv, thaj pijenala sine ko tahtaja jali k khore.

O Roma Muslimanija tari Skopjeskiri Topaana pali profesija sine kovachija, burgijashija, dzambazija, grastadzije, kosutne, hamaldzije thaj agaar naodori. Nekola taro e Topaanakere Roma legarena sine anava spremal olengoro than e dzivdipaskoro, sar so si naprimer o Roma tari topaana o topaanlije. Olengere khera olen basho shporetija kastengje na sinelen ni bara, ni phuv ni odzakija. O dumani jekhutneste ikljola sine prekal dijek specijalno huv ki chatija e khereskiri koja so basho vakti e brshimengiri phandenala sine partalencar.

O purane khera ki Topaana na sinelen dzamija, a rosh ko pire khera lena sine prekal prajbe e chatijakoro thaj prekal ko udara. O Roma e Topaanakere ko ponakhle zamanija sovena sine ko rogoze kerde tari phus, sinelen purane kilimija thaj charge kola so sine kerde taro disavo konopi jali taro pobuter partalija chergengere. O maro garavenale sine ko gone a o pani ko khore. Ki olengiri sinija basho hajbe maro, o hajbe chivelape sine ko phuvjale chare, basho chorbalije zumja kulandinena sine roja, a viljushke nikana na kulandinena sine.

O purane Topaanakere Roma o Maro na chinenale sine numa phagena le sine vastencar. Isi panda but te vakerelpe basho o Topaanakere purane Roma, o chane olengoro dzivdipaskoro, i infrastruktura, o zanatija thaj o tradicije, numa ko tikne nuke agar dikhovela sine jek dzivdipa e Romengoro ki purani Topaana e Skopjeskiri koja so dzi avdive sapanda postoinela.

You may also like...

Sorry - Comments are closed

Send as Kolumns





Full Name (required)

Your Email (required)

Category (required)

Upload File (required: .txt, .doc, .docx)

Captcha (required)
captcha