I edukacija basho o Roma si o nahtari basho ikljoviba taro chorolipa

OBRAZOVANIE

Ko bizo gajle bashi I thari gradinka ko Shuto Orizari thaj olakoro periba, o Emran, Rafeta, Hatija Albina thaj Zekir kerena lafi basho lakoro inportantnost. Ola si egzampli kaj I jekhin e Romengiri ki Makedonija zasluzinena jekhutne shajsarina ki edukacija sar sa o javera ki rashtra. Jekhutno bashi olengje si I ambicija te keren nishani ko sasuitnipa sar profesionalcija thaj manusha.

O Emran Ademi si studenti ko trito bersh ko Makedonijakoro fakulteti. Vakerela kaj I hembari ikerin si oleske taro leskere jerije, kola so si barikane so olengoro chavo ka ovel saslarutno. – Taro vakti ko vakti rovena bashi mangje kana dikhena I bari kupa taro lila basho sikljoviba, numa ko istono vakti si bahtale so sijum egzampli ki familija basho shukar studenti, vakerela o 24 bershengoro chavo.

Oleskiri koleshka Rafeta Kriezi mangjela te kerel buti e chavencar thaj pe studije pali medicina ka lengarel len ki pedijatrija. Vakerela kana ki praksa kamlape te lelpe rat taro chave, oj tegani si hemdorimi taro pire jerije. Sine pobuter asva nego asajbe. Ko odova dakiko nikaske nane inportantno dali sijen Rom. Heminportantno si o chavo, vakerela thaj I Rafeta.

Bashi poshukar arakhin e pacientengiri ko hospitali kamlape thaj medicinakere phejna, pa odoleske I Hatija Arifi halovgjape te studirinel uchi medicinakiri siklana ko Skopje. Oj pakjala kaj ka kerel buti ki ambulanta ko Shuto Orizari. – Ki amari kupatni hembut falinela medicinakoro personali, saslartune, ginekologija, phejna, vakerela I 21 bershengiri chaj. Ko mashkarvakti, akala studentija pali medicina piri praktika kerenala keribaja buti ki organizacija Inicijativa basho bajrovipa thaj inkluzija bashi jekhin IRIZ.

I Albina Dzemailji thaj Zekir Dzemail, kola so si mashkarsikle palo nijami ki siklana Arseni Jovkov, volontirinena isto agar ko Iriz. – Mangava te dav arka e manushen ki akaja stredina. O hembaro kotor olendar na dzanena sar te ikalen izvod e bijamengoro basho pire chave jali sastipaskoro osiguriteti, a te na kera lafi kozom javer nijamija na dzanena te phejrarenlen peske. Odoleske mangaja o nijami, vakerela I Albina.

Ki thari gradinka ko Shuto Orizari, pottik dengjalen thaj o vide ambasadori e Bare Britanijakoro ki Makedonija, Pol Edvards. Ov dengja mesazi kaj I edukacija shurakerela ko akala than thaj kaj bizo olende nashti te ovel shukar shuru kova so ka legarel dzi ko sukcesi e suklen. O Ambasadori isto agar preporachingja e terne Romengje I Programa basho stipendiriba ko jekbershengere magistarsko programe ki Bari Britanija – Chivining. – But bi mangava te dikhav kaj Rom lela akaja stipendija. O avgo kulandiba si kaj ka lel than ki jekhin taro Chivining stipendistija, koja so chachipnaske si aktivno, thaj ka denpe arka mashkar peste ko resariba olengere resarinengoro. O dujto kulandiba si kaj odova manush ka ovel inspiracija basho javera studentija kaj ako kerena buti zoreja thaj olada ka oven legarutne thaj ka shaj te den arka pire sasuitnipa, vakerela o ambasadori Edvards.

You may also like...

Sorry - Comments are closed