I B.O. RROMA lela dujto than ko dujto sikaviba e EU pursakongoro bashi Romani integracija

RROMA

I Regionalno Romani Edukativno Ternengiri Asocijacija RROMA taro Kratovo arakhlili mashkar o triunferija ko dujto sikaviba e EU pursakongoro bashi Romani integracija organizirime taro sherutno basho lafikerina thaj lungokeriba e Evropakere komisijakoro. O ulaviba e pursakongoro kergjape ko 28to mart 217 bersh ko Brisel, kote so I RROMA lela o dujto than basho proekti anavkerdo sar “I sida na dzanela bashi diskriminacija… Araktut”.

Angleder, o sikavutne taro nominirime organizacie sine akharde ki studisko vizita e EU instituciengere ko Brisel taro 26to dzi ko 29to mart. O dzene so lele than sinelen shajdipa te vizitkeren o Evropakoro parlamenti, o Direktorati basho lafikerina thaj lungokeriba, te keren lafi e evro parlamentecar thaj dzevaplime dzenencar taro kotor tari Romani integracija.

I Evropakiri komisija prekal I chipota basho ulaviba e pursakongoro isila bashi resarin te anglederanel basho dikhlariba e Romane populacijakoro po pashchimalo Balkani thaj Khoranipa, kolengoro so potencijali nane nichaleste kulandimo sa resarinaja basho poshukarkeriba e dzivdipaskoro e Romane jekhinakoro, sar thaj sikaviba e politikakere inportantnosteskoro bashi integracija e Romengiri ko procesi e lungokeribaskoro.

O generalno sherutno e Direktorateskoro basho lafikeriba thaj lungokeriba, Kristijan Danielson vakergja kaj I EU ka dzal thaj poodori e dejbaja ikerin ko fondija, a I resaribaskiri kupa te oven o terne thaj o chave, t.e. ikerin bashi olengiri edukacija thaj pottikniba olengere pojaver khelinakoro ki lokalno jekhin, kotar so kulandipa bi ovelale o sasto sasuitnipa.

Tari Republika Makedonija, pursakoja arakhlepe o Romano Resursno Centro taro Skopje, kova so lelakergja o avgo than ko piro proekti bashi tutorengiri ikerin basho o sikle Roma ki fundavno edukaicija sar thaj o RROMA, kola so lelakergje o dujto than nasho o proekti “I sida na dzanela bashi diskriminacija… Araktut!”.

You may also like...

Sorry - Comments are closed