Helsinshko komiteti: Segregacija ki mashkaruni edukacija e siklengiri tari Romani etnikani preperin

helsinski

Dzi ko Helsinshko komiteti basho manushikane nijamija resle nekozom havlarina basho navodno ikljovin e segregacijakoro ko sikle tari Romani etnikani prerin ki mashkaruni siklana “Arseni Jovkov” ko Skopje.

Dzi ko Komiteti irangjepe o sikavutne taro dizutnikano amalipa IRIZ, sikavibaja o problemi koleja so o Romane sikle ko mashkarune siklane arakhenape bershencar, t.e. olengiri segregacija ko palune paralelke ulavde taro o sikle Makedoncija. Taro odola sebepija o duj amalipna dengje prestavka dzi ko Dzijaneskoro nijamengoro arakhutno, t.e. Ombudcmani, koleja so rodena o istono te rodarel nekozom puchiba.

O puchibna legarenape ko chane e keribaskoro paralelke, evidencie basho saskosaskoro numero taro Romane sikle, dali isi paralelke kerde jekhutneste taro Toma thaj dali isi shajsarina basho transfer tari jek ki javer paralelka. Mashkar o javer, pal o ikeriba e sostanoskoro nekozome siklencar tari I andimi siklana, o Helsinshko komiteti thaj o amalipa IRIZ ale dzi ko neve dzandipna kaj ko palune bersha kotor tari sikle, ko disae chipote thaj saste aralelke prechudenape ki nevi pravdi mashkaruni siklana ki komuna Shuto Orizari “Shaip Jusuf” so si panda pobaro piro dzi ki sakoaskiri segregacija akale siklengje thaj anglederanela basho bajrariba e heminengoro mashkar o etnikane jekhina thaj basho tiknariba e kvaliteteskoro ki edukacia e Romengiri.

Tari vizita e Ombudcmaneskiri zojrakerdo si kaj ki mashkaruni siklana “Arsen Jovkov” nane paluno akti basho keriba e paralelkengoro thaj kaj o sikle raschudenape upral funda e rodarinengoro e siklanakere thaj olengere zarurina. Bi achivibaskoro si kaj trujal o bersha o numero e siklengoro tari Romani etnikani jekhin tiknargjape, so si duglipa basho olengere hramovibaskoro ki nevi pravdi siklana Shaip Jusuf.

Tari I kerdi vizita e Ombudcmaneskiri ov na konstatiringja kaj kerelape buti bashi segregacija odoleske soske ko pobuter paralelke isi hramomoe Roma, akoda na sine dikhlo olengoro numero odoleske soske spremal o sodzandipna ko kotor taro paralelke isi po jek dzi ko duj sikle tari Romani etnikani jekhin, a ko kotor taro paralelke isi hramome salde Roma.

Tari javer rig o Ombudcmani konstatiringja kaj palo prajbe e siklanakoro Shaip Jusuf biachovibaskoro si kaj o sikle roma hramonenape ki akaja siklana, so ko lungo vakti shaj negativno te khelel ki olengiri integracija ko jek multukulturakoro sasuitnipa.

Sebepi akava taro Helsinshko Komiteti dena mesazi dzi ko Ministeriumi bashi edukacija thaj nauka thaj o javera nadlezna institucie ko kotor e edukacijakoro te prelen napija thaj aktivitetija te shaj te chinavelpe o shajdipaskoro problemi e odliveja t.e. e hramoviba e siklengoro Roma salde ji jek siklana.

You may also like...

Sorry - Comments are closed