EU info centro: ,,O DROM DZI KO LOGORIJA E MERIBASKERE,, tasvirengiri sikavin basho o genociri e Romengoro ko Skopje

NECO

Avdive ko thana e EU info centroskere ki diz Skopje, ikergjape sikavin e tasfirengiri anavkeri sar “O DROM DZI KO LOGORIJA E MERIBASKERE”. I tasfirengiri sikavin si kerdi basho o Roma kola so ko vakti e holokausteskere sine mudarde thaj doshperavde ko pobuter meribaskere logorija.

O avtori e tasvirengere sikavinakoro si o Rajo, Makai Istvan tari Ungarija, kova so si prezidenti ki Romani dizutnikani organizacija “Centro bashi Romengiri edukacija, kultura, historija thaj Holokausti” ki Budimpeshta.

Te shaj te organizirinelpe akaja tasfirengiri sikavin e rajoskiri Makai tri Budimpeshta, ko Skopje bare zorija thaj inicijativa dengja o Ministeri ki Radza e R.Makedonijakiri thaj o nacionalno koordinatori ki Radza e R.Makedonijakiri, o Rajo Nezdet Mustafa.

O Ministeri Mustafa, ki shukar mashkarbutikerin isto agar e Ungarijakere Ambasadoreja ki R.Makedonija, o rajo Jozef Benche, shajsargje e Rajoske Makai piri sikavin e tasfirengiri, koja so si phanli e genocideja kerdo upral o Roma, avdive te ikerelpe ko Skopje, koja so ka ovel pravdi dzi ko agor taro chon fevruari, a palo odova i istono tasfirengiri sikavin te ovel sikavdi ko panda 6 javer dizja ki them: Veles, Shtip, Kochani, Vinica, Prilep thaj ki Bitola.

Ki svechano pravdin akale tasvirengere sikavinakiri piro lafikeriba sine e ambasadore e Ungarijakere ki R.Makedonija, o rajo Jozef Benche kova so sikavgja piro chalipa so ki inicijativa e Ministereskiri Mustafa, ov da ulo kotor taro o organizatorija basho te ikerelpe akaja sikavin, sar thaj sikavga piro hor rojbe thaj vakeriba kaj nikana pobuter na bi mangjela akava genocide te kerelpe palem upral o Roma thaj upral o javera nacionalitetija.

Ki akaja svechano pravdin tari i tasfirengiri sikavin telal ki tema “O DROM DZI KO LOGORIJA E MERIBASKERE”, lafi kergja o sherutno inicijatori bashi i sikavin te ikerelpe ki Makedonija, o Rajo Nezdet Mustafa.

Piro lafikeriba thaj sikaviba e historijakiri thaj e motivacijakiri basho ikeriba akale sikavinakiri sine e korkori avtore e sikavinakoro o rajo Makai Istvan.

Ko agor musaj te andina kaj akoda sine akharde sa o televizije thaj patrina te nishanikeren akaja chipota so iklili avdive ko Skopje, a koja so si phanli e Romencar thaj e dejbaja haberi basho genocidi so ko nakhle zamanija kergjape upral o Roma, ni jek javer medium sem i Jekhutni Romani Televizija Shutel Sat, na ale te informirinen e dzijane bashi akaja chipota. Chivelape o puchiba: So bi ovela e Romane dzijaneja ki Makedonija, ko Balkani thaj ki Evropa, dzikote na postoinela i Televizija Shutel Sat te del haberi basho sa o chipote phanle e Romen? Bi avaja li bizi i Televizija Shutel Sar dzi ko sakosakoro karanluko basho o informiriba e Romane dzijaneskoro ko sasto Sumnal?

You may also like...

Sorry - Comments are closed

Send as Kolumns





Full Name (required)

Your Email (required)

Category (required)

Upload File (required: .txt, .doc, .docx)

Captcha (required)
captcha