Dizjakorosherutno ki Ungarija e Romen iranelalen ko logorija !!!

GRAD UNGARIJA

Ushtene ki ekvashirat, phirena kilometrencar te shaj ko 6 o ari javinakoro te oven ko pire bukjarne thana. Kopinena arencar bizi pauza, a isto agaar isi chivdo thaj video dikhlariba kova si dikharelalen dzi ko paluno olengoro piro. O bukjarne si sakosa Roma, a olengoro dzeno so delalen buti si o nevo dizjakorosherutno ki Ozda – Ungarija, o 20 bershengoro David Janichak, kova so pire asavle legaribaja iranela napalal e Romen ko vakti e logorengoro.

Jek tretina taro o dizutne ki akaja diz koja si isila 34 mile dizutne si Roma. Pobuter olendar kerena buti palo dizjakere polija ko phejrariba e sasuitnikane proektengoro.

Sar so o nakhlo bersh o Janichak alo ko legariba o shartija bashi buti si but pophare. Isilen pobuter bukjarne arija, pohari pauza thaj chivgja e Romengje video dikhlariba ko olengere bukjarne thana. O Janachik angledervakergja kaj akala napija si sa resarinaja te shaj ko delimichno chane te paldel e Romen tari pi diz.

O neto ikaliba e lovengoro basho akala bikvalifikuime Romane bukjarne dzene legarela 165 evroja, kove kola so basho but dzene olendar si lengje zaruri, odoleske soske i Radza tiknargja i socijalno arka basho o bibukjarne dzene. O pobaro numero taro o Roma ki Ozda dzivdinena ko nashukar shartija, ko chorole kotora bizo fundavno infrastrukturakere zarurina.

O Januchak zaostringja o napija e programakere. I buti palo lengoro vakti shurakerela duj arija porano, taro odova so sine angleder akava, a ko odova vakti taro o dive nane nichalo numero taro proizvodime artiklija, odoleske soske pobuter olendar phirena pirencar dzikana te resen ki buti. O Roma rovenape kaj nanelen nichale pani thaj toaleteskoro lil thaj rovenape kaj ko jek bukjarno ari isilen salde po 5 dakikija pauza.

A, kana kerelape lafi basho o puchiba, soske si chivde o kamere kola so kerena dikhlariba, o Janachik vakerela kaj ko sa o bukjarne thana ko bajrardo thaj civilizirimo sumnal isi asavko dikhlariba. Basho odola manusha, o Roma, poshukar bi ovela lengje kana ka chanen kaj nekoj dikharela len dzikana kerena buti, agorkerela o Janichak.

You may also like...

Sorry - Comments are closed

Send as Kolumns





Full Name (required)

Your Email (required)

Category (required)

Upload File (required: .txt, .doc, .docx)

Captcha (required)
captcha