Chinavgje lendar I socijalno arka sebepi 50 evrija, akana o Romano jeriluko Demirovi ka musaj te iranen 40 mile denarija !!!

ДЕМИРОВИ

O Turkijan Demirov, si bibukjarno Rom, dzivdinela ko Kumanoveskoro Sredorek pire romnaja thaj pire 5 chavencar, ko purano kher, kova so achilole taro piro dat. Jekhutno prihod sine leske I socijalno arka. Numa, angleder duj bersha, olengoro jerije taro stranstvo bishalgja lengje 50 evroja sar pursako prekal western union. Numa, ko than te ikljol lengje ki arka, akala love angleder angje lengje baro zijani.

Chinavgje amendar I socijalno arka thaj naneamen nisavi ikerin. Rodingjam arka taro nadlezna institucie, dengjam pismeno rodariba basho iraniba e socijalno arkakoro. Na salde so na lele ko anglederdikhiba amaro rodariba, numa phanle amen te irana 40 mile denarija.

Palo odova aljam dzi ko dodzandipa kaj nane javer ikljoviba akate ki Makedonija thaj halovgjamamen mire jerilukoja te ikljova tari them thaj te dza te roda azili, vakerela o Demirov. Odoleske soske chinavgje lendar o jekhutno avipa dzi ko love, ola gele ki Germanija. Palo jek bersh sar so beshle ko jek kampi, olengoro rodariba basho ekonomijakoro azili sine lendar nalelakerdo thaj palem irangjepe ko Kumanovo. Ov shurakergja te kerel buti ko kalo, sar gradezno bukjarno, sa dzikana na dodzivdingja bibahtalipa.

O Romano ministeri basho trud thaj socijalno politika, Ibrahim Ibrahimi vakerela kaj ka orden ko Kehdiba te hazrkerenpe tranpe ko kanuni basho socijalno puchina, koleja so ka precizinelpe kozom legariba si muklo te lenpe prekal sig transfer lovengoro dzi ko jerilukija kola so lena socijalno arka. O aktuelno kanuni na anglederdikhela prihodija taro duj thana, sebepi so thaj o jeriluko Demirovi na dikhle nisavo hairi taro o 50 evrija kola so lele len sar pursako.

– Jekajek e kanuneja bashi socijalno arakhin, sa o love resle ki ziro esapin, kamlape te oven prijavime ko Centro basho socijalno puchina. Dzikote odova kerenale o jerilukija so lena socijalno arka nane te ovel lendar chinavdi I istono arka. Ako kerena mujal akava, amen laja sikavina tari Legarin basho Sasuitnikane Prihodija kaj dijek dzeno isile lendo strestvija kola so nane prijavime. Jekajek e kanuneja, avela chinaviba e socijalno arkakoro, vakergja o Ibrahimi.

Spremal centro bashi socijalno arakhin, ko thavdipa e palune duj bershengoro uprder 2000 jerilukija achile bizo socijalno arka sebepi o isijba love ko olengere esapina. Tari akaja institucija vakerena kaj I tranma e Delovnikoskiri si andi taro Kabineti e eks-ministereskiri Dime Spasov.

You may also like...

Sorry - Comments are closed